L’Axencia Asturiana de Cooperación al Desarrollu convoca la tercer edición del concursu pa Secundaria y Bachilleratu sobre Derechos Humanos. Pueden presentase testos n’asturianu, gallego-asturiano y castellanu rellacionaos col conteníu de la Declaración Universal de los Derechos Humanos aprobada nel 1948 pola Asamblea Xeneral de les Naciones Xuníes.
Hasta’l 15 de payares tienes pa informate y documentate y presentar el to trabayu. Cada centru va poder llevar énte’l xuráu un máximu de 3 per cada aula perteneciente a caún de los ciclos educativos nes trés categoríes esistentes: l’A, pa microrrellatos en primeru y segundu de Secundaria; la B, pa microrrellatos en terceru y cuartu; y la C, pa rellatos en Bachilleratu.
El premiu pal meyor de caúna va ser una cámara instantánea, valorada en 180 euros, y un llote de llibros, mentes que’l segundu clasificáu y el terceru van recibir, amás d’exemplares, máquines tasaes en 130 y 90 euros, de manera respeutiva. Los centros de los vencedores tamién van disfrutar d’un llote de llibros.
Con esti concursu l’Axencia Asturiana de Cooperación al Desarrollu, que xestiona aiciones de cooperación al desarrollu, solidaridá internacional y defensa y promoción de los derechos humanos en tol mundu, pretende fomentar ente los estudiantes «los valores de solidaridá, respetu y xusticia social, motivar la creatividá de la mocedá, amás de llograr un acercamientu y conocimientu mayor de la vulneración de los Derechos Humanos nel mundu, pa que puean exercer un rol activu como axentes constructores d’una sociedá asturiana cada vez más solidaria y inclusiva». Si te presta participar, has consultalo a los tos profesores, yá qu’han de presentalos los centros educativos.
