El vienres 3 de mayu va abrir les sos puertes en Xixón la esposición que xira alredor d’ún de los llibros infantiles más esitosos del 2023: ‘Animatopeyes’ (Trabe). De manera paralela, van entamase talleres de baldre pa trabayar con globos y papel pa los qu’hai qu’apuntase con antelación.
‘Animatopeyes’ ye una obra pa prellectores de Rafa R. Valdés y Samuel Castro que presenta a animalinos colos soníos que faen. Destináu, poro, a los más pequeños de la casa, cuenta con dibuxos mui prestosos que se van treslladar a la muestra en forma de llámines y material pa trabayar los distintos sentíos en rellación colos animales (muñecos de trapu, identificación de soníos…), polo que les neñes y neños más mayores tamién van poder disfrutar d’ella.
Amás, la Oficina de Normalización Llingüística de Xixón programa talleres pa trabayar con globos (globoflexa) y papel (papiroflexa) enfocáu a edaes ente los 4 y 7 años. Van celebrase los díes 6, 13 y 20, los primeros, y el 8, 15 y 22, los segundos, a les 18.30 hores na mesma sala d’esposición con un llargor de 45 minutos.
Cada sesión tien un máximu de 10 places, polo que nun tardes n’apuntante. El plazu va abrise’l xueves a les 8.30 hores nesti enllaz.
¿Y hasta cuándo va tar abierta la esposición? Hasta’l 31 de mayu, na sala 3 del Centru de Cultura Anitiguu Institutu. ¡Nun te la puedes perder! ¡Goin goin!
Na imaxe, actividá colos recortable de ‘Animatopeyes’ nel puestu d’Iniciativa pol Asturianu na Feria Internacional de Muestres d’Asturies (FIDMA). Semeya propiedá d’Ediciones Trabe.
