Del 20 al 27 de xunu va tar abiertu’l plazu pa la matriculación nes materies de Llingua Asturiana y Gallego-asturiano. Si yá vas a Secundaria o’l Bachilleratu va ser del 3 al 14 de xunetu, pero tengas la edá que tengas, ‘Nun ye días más voltas / Nun-y deas más vueltes’ y apúntate.
Ésti ye’l lema de la campaña qu’entama la Conseyería de Cultura, Política Llingüística y Turismu p’afalar a que los que vayáis a asturianu sigáis deprendiendo l’idioma como hasta agora y pa los qu’entovía nun lo facéis animavos a dar el pasu. Agora ye’l momentu d’escoyer.
‘Nun ye días más voltas / Nun-y deas más vueltes’ inclúi cartelería y dípticos y espacios pa televisión y radio, que se van emitir en TPA y RPA, nos qu’escolinos, maestros y familia falen de lo que-yos aporta l’asignatura de gallego-asturiano y asturianu. Has de velos o sentilos, porque son mui prestosos y vas poder conocer un poco más sobre la materia.
