Tolo bono tien el so final, pero pocos finales son tan prestosos como’l que nos ufre Escenines pa la Reciella. L’escenariu del patiu del xixonés Antiguu Institutu conviértese nuna biblioteca vieya na obra ‘Cuidá coles palabres’, que va trayer muncha maxa y sorpreses.
Les dos antigües trabayadores, les bibliotecaries Violeta y Julia, tornen al edificu pa despidise d’él. Na visita atopen los llibros de Milio, los sos preferíos, y queden pa disfrutar de les sos histories desconociendo que, dacuando, les palabres fáense realidá.
La función va arrancar a les 19 hores, tamién con entrada llibre, pero recuerda que ‘Reciella. Families pol Asturianu’ recomienda llegar con antelación porque l’enllenu pa disfrutar de la obra de Guayominí Producciones ye más que posible y l’accesu va permitise hasta que se complete l’aforu.
