La Biblioteca de Les Vegues acueye un añu más ‘Veranu Lliterariu’ el ciclu que tolos llunes avera a Corvera a un autor de lliteratura infantil pa falar de la so obra coles neñes y neños asistentes. ¿A quién te prestaría dir a ver?
Les sesiones son los llunes de xunetu y agostu, de 11.30 a 12.30 hores, entamaes pola Casa de la Llingua. Berto García va ser el 3 de xunetu, el primeru n’alcontrase colos sos llectores.
Tamién van participar nesta edición, la decimoprimera, Susana Sela (10 de xunetu), Pablo Fraile (17 de xunetu), María Esther García López (24 de xunetu), Rafa R. Valdés (31 de xunetu), Dolfo Camilo Díaz (7 d’agostu), Lluís Aique Iglesias Fernández (14 d’agostu), Samuel Castro (21 d’agostu) y Daniel García Grande (28 d’agostu). La entrada pa esta actividá de promoción de la llectura infantil n’asturianu ye de baldre, una oportunidá única pa conocer a los tos autores favoritos.
Na semeya, sesión del añu pasáu na que partició Iglesias Fernández.
