El 17 de payares va celebrase la primer fase, clasificatoria pa la final, de la Olimpiada Escolar de Redaición. Fala cola to maestra o maestru de Llingua Asturiana y Lliteratura pa ver si’l to centru cumple los requisitos pa participar nesti concursu tan prestosu.
L’Academia de la Llingua Asturiana (ALLA) entama per segundu añu esta iniciativa que lleva’l nome d’Urbano Rodríguez en mou d’homenaxe a esti profesor. Cuenta con dos categoríes, escolines y escolinos de Primaria y de Secundaria y bachilleratu, y divídese en dos fases.
La primera celébrase’l 17 de payares y consiste na ellaboración d’una redaición siguiendo un tema y unes condiciones que va marcar nesi momentu, a les 10 hores, l’ALLA per videoconferencia. El maestru va decidir cuáles son les que merecen pasar a la final del 20 d’avientu, que va ser n’Uviéu, nel llar de la institución, nuna mañana inolvidable.
Pues llevar como premiu material escolar, llibros y un elementu conmemorativu, pero namás por participar yá lleves un diploma. ¿Anímeste?
Pa ello, el to centru ha contar ún o más espacios con cámara, pantalla y conexón a Internet, y inscribise siguiendo les bases del concursu, que va abrir el plazu n’ochobre. Tas a tiempu pa prauticar y ameyorar la to escritura n’asturianu pa vivir una gran esperiencia xunto coles tos compañeres y compañeros.
