Ochobre ye un mes especial, yá que’l 16 celébrase’l Día de les Escritores. Xosefa Xovellanos ye una de les más destacaes de la lletres asturianes y un añu más va viaxar nel tiempu pa tar presente nos actos que se programen nel Mercáu Artesanu y Ecolóxicu de la Plaza Mayor de Xixón.
Nunca quier perdese esta cita y, cola collaboración de la Oficina de Normalización Llingüística, que prepara la iniciativa ‘Ente fueyes. Ochobre lliterariu’, va alcontrase coles neñes y neños xixoneses pa que la conozan en persona mañana a les 18.30 hores y el vienres a les 12.30. Amás van entamase talleres sobre la so obra.
Nun ye la única actividá pa la reciella pa estos dos díes entamaes baxo’l nome de ‘Pallabra de muyer’. Va tar disponible pa los asistentes la esposición entitulada ‘Les coses que-y presten a Fran’ a partir del llibru de Berta Piñán y Sergio Buelga va poner cuentacuentos sobre’l mesmu a les 17 hores.
La Oficina de Normalización Llingüística tien preparao amás unes tarxetes qu’incluyen testos venceyaos a la risa y l’humor, el tema al rodiu del que ta organizada esti añu la celebración del Día de les Escritores.
Na semeya, Xosefa Xovellanos na visita del añu pasáu. Semeya propiedá de la Oficina de Normalización Llingüística de Xixón.
