N’Asturies celebramos la Nueche d’Ánimes el 31 d’ochobre. Son munches les actividaes que se programen esti día pela tarde y la nueche pa festexar esta tradición tan de nuesu que nun has de confundir con Halloween, anque tengan el mesmu orixe.
En Xixón, nel barriu d’El Llano celébrase Samaín, un términu tamién importáu, con actividaes énte la piscina, onde finar La Güestia un pasucais que va entamar na sede de l’Asociación Vecinal La Serena.
En Mieres el Conceyu repite un añu más el ‘Nun ye Halloween, ye Samaín’ na plaza’l Requexu. A les 18 hores va entamase’l Gran Baille d’Ánimes por equipos, destináu pa neñes y neños de 6 a 12 años, y yá de nueche, de 23 a 2 hores, DJ Masip torna a animar la folixa.
En Gozón, que venía emplengando Samaín pa la celebración, esti añu escueye’l nome asturianu de Nueche d’Ánimes. Va tener llugar nel parque Zapardel dende les 20 hores con un programa tamién en llingua asturiana qu’inclúi’l VIII Concursu de Calabaces, un amagüestu, música tradicional con Andecha Tuercipié y la presencia de seres mitolóxicos representaos por Compañía Vuelta y Media.
En Corvera tamién apuesten por Nueche d’Ánimes, anque convierte l’aguilandu nun americanizáu pola televisión y el cine ‘truco o trato’. Va ser nos comercios del conceyu pela tarde, mentes qu’a les 16.30 hores ta previsto un concursu de mazcaritos nel salón d’actos del Tomás y Valiente, un pasucais per Les Vegues a les 17 hores y una casa del terror baxo’l nome de ‘Autopista al infierno’ nel Teatru El Llar pa menores de 12 años de 19 a 21 hores y pa mayores de dende les 21.30 hores.
En Valdés celebren Samaín con un taller de calabaces (17 hores), un cuentacuentos (17.30 hores), un amagüestu (18 hores), actuaciones y, pa pesllar, a les 22 hores, una nueche de terror na Casa de la Infancia.
En Llaviana entamen otru ‘truco o trato’ de 18.30 a 20 hores en comercios.
