Candás va acoyer esta fin de selmana’l II Reguerada Fest, un puntu d’alcuentru y promoción de la cultura asturiana. Ésti cuenta con una programación destinada al públicu infantil na Fábrica d’Ortiz, onde va instalase una esposición, van ponese talleres y Alicia Álvarez, en compañía de David Varela, va poner un conciertu sobre’l so ‘Kikirikikí’.
Mañana a les 17 va inaugurase la esposición del taller infantil d’escritura de caligrames nes escueles cola presencia de Aurelio González-Ovies y María Esther García López. A les 18.30 hores va ponese un taller infantil de construcción de títeres con Pintar-Pintar.
El conciertu d’Álvarez y Varela va tener llugar el sábadu al meudía, al que va siguir una actividá con Acuto Xuegos. El domingu, tamién a les 13 hores, Susana Sela va dirixir un taller nuevu.
Amás va instalase nel llugar un mercáu d’empreses n’asturianu nel qu’atopar xuegos o llibros infantiles y xuveniles n’asturianu. Van tar presentes La Fabriquina, Nenyuri Ediciones, Pintar-Pintar, Trabe y Acuto Xuegos, ente otros.
