Una de les persones fundamentales nel estudiu de la lliteratura asturiana de les décades últimes ye Xosé Bolado. Críticu lliterariu, editor y tamién poeta n’asturianu nuna etapa avanzada de la so vida, finó en mayu del 2021 depués d’una llarga enfermedá.
Bolado naz n’Uviéu nel 1946, pero pasó gran parte de la so vida en Xixón, llegando a presidir l’Atenéu Obreru a lo último de los años 80. Llicenciáu en Filosofía y Lletres (Filoloxía Románica) desendolcaría’l so llabor profesional n’Asturies y, finalmente en Madrid, como docente.
¿Sabíes qué…? La XLIII Selmana de les Lletres Asturianes dedicóse a la so figura nel 2023 como homenaxe al so destacáu llabor.
La lliteratura, la cultura, la reivindicación llingüística y la llucha pola democracia foron los grandes motores de la so vida. Participó na refundación del Atenéu Obreru de Xixón nel 1981, entidá que llegó a presidir, y nel 1988 l’Academia de la Llingua Asturiana (ALLA) nomólu académicu, faciéndose cargu na institución de la so especialización, los estudios lliterarios.
Na ALLA promovió la revista ‘Lliteratura’, de la que foi direutor del 1990 al 2017, y promovió dende l’Atenéu Obreru de Xixón una coleición de poesía entitulada ‘Deva’ y ‘Tiempu de cristal’, esta última n’asturianu dafechu. Foi autor nel 1989 de la ‘Antoloxía poética del Resurdimientu’ nel qu’incluyó a Manuel Asur, Sánchez Vicente, Pablo Ardisana, María Teresa González, Concha Quintana, Roberto González-Quevedo, Antón García, Berta Piñán, Lourdes Álvarez y Xuan Bello, autores qu’en dalgunos casos taben acabantes d’asoleyar el so primer títulu y que se convertiríen en nomes importantes de les nueses lletres.
¿Sabíes qué…? Boladao fala de Resurdimientu en contraposición col utilizáu mayormente Surdimientu porque entiende que la lliteratura asturianu nun naz na década de los 70 y 80, sinón que ye una continuidá de lo fecho anteriormente.
Más alantre, nel 2013, volvería a acertar nuna conferencia, al citar a escritores nuevos naquel momentu como Pablo Texón, Vanessa Gutiérrez o Héctor Pérez Iglesias. Una amuesa del bon güeyu de Bolado, que tamién foi clave p’animar a autores a la escritura, casu d’Alejandro Fernández-Osorio.
Como escritor nun asoleyaría poesía n’asturianu hasta los 57 años. Sicasí espublizó trés llibros, ‘Conxura contra la decadencia’ (2002), ‘Na estación de los relevos’ (2006) y ‘La bona intención’ (2012), que lu convierten nún de los autores más destacaos del Resurdimientu, una producción que s’incluyó na so totalidá nel llibru ‘Cola suavidá del aire’ (2022), xunto con otros poemes esplubizaos na antoloxía del Surdimientu ‘Toma de tierra’ (2010) de José Luis Argüelles y nel llibru billingüe póstumu qu’espublizó Esther Muntañola ‘Un pájaro tan ligero’ (2021), p’axuntar tola so obra completa en llingua asturiana nun mesmu títulu, un total de 102 creaciones.
RESPUENDI ESTES ENTRUGUES:
-¿Por qué ye importante Xosé Bolado?
-¿Sabría dicir los proyeutos editoriales nos que participó?
-¿Qué ye’l Resurdimientu?
-¿Qué carauteriza a la so creación poética n’asturianu?
