Ye ensin dulda l’eventu cultural y festivu más importante del branu xixonés y ún de los festivales con más repercursión internacional de los que se celebren n’Asturies. Tamos falando de la ‘Semana Negra’, certame lliterariu dedicáu a la novela negra que tolos meses de xunetu trai a decenes d’autores d’esti xéneru y otros escritores y artistes de primer nivel a Xixón.
La primer edición de la ‘Semana Negra’ celebróse nel añu 1988 n’El Musel con organización de Juan Cueto, Chus Quirós, Paco Abril, Silverio Cañada y, dende México, de Paco Ignacio Taibo II, que sería’l direutor en siguientes ediciones. L’escritor asturmexicanu taría al frente del certame lliterariu hasta’l 2012, cuando dexaría pasu a Ángel de la Calle.
¿Sabíes qué…? Nun primer momentu l’eventu diba celebrase en Barcelona, pero la insistencia del alcalde Vicente Álvarez Areces permitió que l’alcuentru d’escritores policiacos que foi xerme de la ‘Semana Negra’ viniera a Asturies.
Más de 60 escritores de tol mundu participaron como convidaos naquella primer ocasión, que sería un ésitu de públicu. Manuel Vázquez Montalbán, l’arxentín Juan Sasturain, l’estauxunidense Donald E. Westlake, l’inglés Julian Rathbone, la xaponesa Masako Togawa o’l soviéticu Yulián Semiónovich Semiónov foron dalgunos de los autores qu’aportaron a Xixón nel ‘tren negro’, un convói procedente de Madrid colos participantes que, dende entós, marca l’entamu de la cita lliteraria.
Éstos foron los primeros d’una llarga nómina d’autores que pasaron pela ‘Semana Negra’ nestos más de 30 años, una cita que foi creciendo poco a poco hasta atrayer a Xixón a los meyores autores del momentu nel xéneru negru y n’otros. Nel 1989 pasaba a celebrase n’El Fomento, más cerca de la ciudá, pero viviría los sos meyores años na redolada d’El Molinón nel cambiu de sieglu.
¿Sabíes qué…? La ‘Semana Negra’ cuenta con mascota. Tien el nome de Rufo y tolos años carauterízase de manera diferente, con dellos rasgos comunes.
Una sentencia xudicial impidió que se pudiera facer na zona del centenariu campu de fútbol por una denuncia de los vecinos d’un edificiu por ruíos y molesties, polo que dende’l 2008 el festival tuvo que facese itinerante y buscar abellugu na sablera d’El Natahoyo, na de L’Arbeyal o nuna finca habilitada nel campus universitariu, apegáu a la Escuela de Marina. Hasta asentase nos años últimos, dende’l 2012, nos terrenos de los astilleros de Naval Xixón, tamién n’El Natahoyo.
Nesi recintu per 10 díes vas atopar charres, presentaciones, alcuentros con escritores, esposiciones, conciertos… Un ampliu programa que se complementa con una zona de puestos de llibros y artesanía, otra de restauración y d’atracciones de feria axuntando d’una manera especial lliteratura, cultura y diversión.
RESPUENDI ESTES ENTRUGUES:
-¿Qué ye la ‘Semana Negra’?
-¿Por qué ye tan importante?
-Cita otros xéneros lliterarios que conozas amás del yá referida novela negra.
-¿Qué otres actividaes o certámenes sobre llibros que se faigan n’Asturies conoces?
