Llamábase Juan Díaz-Faes, pero tol mundu conocíalu como Xuanón de Cabanaquinta. Nació nesti pueblu d’Ayer nel 1821, midía más de dos metros y convirtióse nuna persona mui popular en toa Asturies por ser cazador d’osos.
Hasta ehí too paez normal, pero non, Xuanón nun yera un cazador cualquiera. Él yera quien a enfrentase con estos mamíferos tan fuertes, con garres capaces de provocar firíes mortales, cuerpu a cuerpu, una valentía que-y dio tan merecida fama.
¿Sabíes qué…? Xuanón, que vivió 73 años, llegó a ser alcalde d’Ayer.
La so vida ta enllena d’histories y mitos, que llegaron a salir fuera d’Asturies. Cuenten que na so vida llegó a cazar más de 90 osos, dalgunos cola ayuda de les sos manes y cuchiellu, y la so fama permitió-y tener rellaciones cola nobleza y la monarquía.
Llevábenlu a caceríes Isabel II, Alfonso XII, el Marqués de Campusagráu o’l de Pidal, Alejandro, padre de Pedro Pidal, o’l xeneral Prim. El rei inclusive llegó-y a regalar una escopeta, lo que significaba contar col títulu de ‘armeru real’.
¿Sabíes qué…? Hai testimoniu de qu’en Cuba, na población de Matanzas, había nuna ilesia una imaxe de Xuanón puesta por emigrantes asturianos nuna capiella dedicada por catalanes a la Moreneta, la virxe de Montserrat, lo qu’amuesa la popularidá qu’algamó.
La so fuercia y la lleenda sobre él con respeuto a los osos fixo que s’enfrentara en llanzamientu de barra a otros homes fuertes d’otros territorios, Andalucía o Aragón, por iniciativa de terceros que facíen apuestes pol ganador. Nunca dixo que non, al presta-y ser reconocíu, y cuéntase que siempre ganó.
La llingua d’espresión de Xuanón yera l’asturianu, de la que presumía tanto n’Ayer como fuera d’Asturies. Tamién-y gustaba llevar paxellos tradicionales, como xilecu, calzón y montera, y tuvo siempre’l respetu y apreciu de los so vecinos, y fama en Francia o América.
RESPUENDI ESTES ENTRUGUES:
-¿Cuál ye la carauterística principal que convirtió en mitu a Xuanón de Cabanaquinta?
-¿Quiénes yeren Isabel II y Alfonso XII?
-¿Por qué ta protexíu agora l’osu n’Asturies y cuála ye la so situación anguaño?
-¿Sabríes dicir animales qu’anguaño son cinexéticos?
Semeya (recortada) obra de Jorge Díaz, baxo llicencia CC BY-SA 2.0.
