Esta culiebra pequeña ye mui habitual n’Asturies y tien la carauterística de ser venenosa. Una mordedura de so nun debería crear complicaciones escesives, sacante a neños y mayores, pero conviene tratales rápidamente yá que nun son poques les pesones que requieren hospitalización.
Nel casu de tener un alcuentru, siempre fortuitu, yá qu’esti reptil nun ataca si nun se ve acorraláu, ye inmovilizar la zona afeutada y caltener la calma pa que’l venenu nun se distribuya más rápido pel nuesu cuerpu al traviés del sangre. Lo siguiente sería llamar a los servicios médicos y retirar aquellos elementos, como xoyes o ropes axustaes, pol hinchazón que va llegar.
¿Sabíes qué…? La víbora cuenta con dos colmillos güecos, que ye per onde echa’l venenu al morder.
Esta circunstancia que namás ha provocar que tengamos respetu a la víbora, como al restu d’animales xabaces, nun quita que sía un ser estraordinariu. La que s’alcuentra en toa Asturies ye la variedá ‘vipera seonani’, que suel tener 50 cm de llargor, y identifícase pola so cabeza triangular.
Conocida como víbora cantábrica, pue atopase en tolos territorios del norte dende Galicia y Navarra, pero tamién nel suroeste de Francia y nel norte de Portugal. Ye habitual veles en viesques abiertes o caleyes de pocu pasu, guardaes munches veces baxo piedres o tueros.
¿Sabíes qué…? N’Asturies vive una subespecie de la ‘vipera seonani’, la ‘vipera seoanei cantabriaca’, en concreto nel suroeste de Picos y nos montes del suroccidente, amás de nel norte de Lleón y oriente de Galicia–, de diferente coloración y más tóxica.
Aliméntense principalmente de royedores, a los que mata utilizando’l so venenu, anque tamién pue comer aves de tamañu pequeñu o otros reptiles como llagartexes. Por contra, los sos depredadores son aves de presa como águiles o mamíferos como raposos o llóndrigues.
Por desgracia, ye una especie que cada vez se ve menos, yá que la so población ta desciendo por efeutu del home, yá sía por desaniciu del so hábitat, quemes de monte o atropellos. Ye de mayu a setiembre los meses cuando ye más fácil atopar un exemplar, pero ten siempre cuidao, guarda la distancia y trata de que nun se sienta acorralada pa evitar una mordedura.
RESPUENDI ESTES ENTRUGUES:
-¿Cuántos tipos de víbores viven n’Asturies?
-¿Ónde pues atopales?
-¿Por qué hai que tomar precauciones cuando ves una?
-¿Qué hai que facer si tenemos la mala suerte de que nos muerdan?
Na imaxe, una ‘vipera seoanei cantabriaca’. Semeya obra d’Alejo Concheso Calvo baxo llicencia CC BY-ND 2.0 Deed.
