El ciclu ‘Ente fueyes. Ochobre lliterariu’ de Xixón ufre actividaes pa públicu mozu. Los díes 12 y 13 prográmense talleres, un cuentacuentos y una esposición na Plaza Mayor, onde vamos poder conocer a Xosefa Xovellanos, pero enantes, esti llunes, va representase la obra ‘Les madreñes vacíes’ nel Antiguu Institutu.
Carlos Alba ye la persona que pon esti espectáculu de títeres y música. La obra, que ganó l’últimu Premiu y Festival Nel Amaro de Teatru Profesional en Llingua Asturiana y Gallego-asturiano, presenta a un xuglar qu’atopa a Miguelín, un neñu pastor al que nun-y dexaron nada los Reis Magos esti añu.
Estrañaos, entrambos deciden entamar un llargu viaxe pa contra Oriente, onde s’enteren de que Melchor, Gaspar y Baltasar tán secuestraos pol Señor de la Guerra. Nu queda otra que facer tolo posible pa lliberalos.
La representación de ‘Les madreñes vacíes’ va celebrase esta tarde de baldre nel patiu del Centru de Cultura Antiguu Institutu dende les 19 hores. Nel casu de que nun puedas dir, vas tener otra oportunidá de disfrutar d’esta prestosa obra’l día 27 n’Uviéu, función programada a les 18 hores nel Teatru Filarmónica.
