Bien conocíu pol so carauterísticu aniellu, Saturnu ye’l sestu planeta alloñáu del Sol depués de Mercuriu, Venus, la Tierra, Marte y Xúpiter, y el segundu en masa y tamañu. Trátase d’un cuerpu masivu gaseosu formáu por un 96 por cientu d’hidróxenu y un 3 por cientu d’heliu.
El so nome vien del dios romanu de l’agricultura y la collecha Saturnu, en llatín Saturnus, padre de Xúpiter. Ye l’últimu planeta que se pue ver dende la Tierra ensin necesidá de telescopiu, polo que per munchos años consideróse’l más llonxanu.
¿Sabíes qué…? L’aniellu de Saturnu ye en realidá un conxuntu d’aniellos, un total de siete con especiu ente sí, formaos por millones de roques y cachos de xelu qu’orbiten alredor del planeta.
La distancia de Saturnu col Sol ye d’unos 1.418.000.000 quilómetros, mui lloñe de la Tierra, que ta a 150.000 quilómetros de promediu del gran astru, esto ye, a 9.4 unidaes astronómiques (1 ye la distancia que tien el nuesu planeta). Tarda 29 años y 167 díes terrestres en dar una vuelta completa a la nuesa estrella.
El periodu de rotación ye de 10 hores y 34 minutos, polo qu’esto ye lo que dura un día en Saturnu. A diferencia de nosotros que tien un satélite, la Lluna, cuenta con 146 reconocíos pola Xunión Astronómica Internacional, siendo Titán el más grande de toos.
¿Sabíes qué…? Titán ye consideráu’l cuerpu celeste más asemeyáu a la Tierra nel Sistema Solar. Ye l’únicu satélite que cuenta con atmósfera, lo que permiten que se produzan procesos meteorolóxicos asemeyaos, anque con metanu en llugar d’agua.
Saturnu aseméyase a Xúpiter na so composición, con duldes sobre como podría ser el so nucleu internu. Cuenta con una atmósfera na que se producen fuertes raches d’aire y habitualmente tormentes de gran tamañu que pueden durar meses, dalgunes visibles dende la Tierra.
Galileo foi, nel 1610, el primeru n’observar los aniellos de Saturnu, pero yá había conocencia del planeta dende munchu tiempu atrás. Nun se podría sobrevolar el planeta hasta’l 1979, cuando lo fixo la sonda estauxunidense Pioneer 11, y nes décades últimes namái otres trés misiones llegaríen hasta esti llonxanu cuerpu celeste, la última la Cassini/Huygens, que llegó a la zona nel 2002 y permaneció n’órbita hasta’l 2017, dándonos impresionantes imáxenes de los aniellos.
RESPUENDI ESTES ENTRUGUES:
-¿Cuáles son les carauterístiques principales de Saturnu?
-¿Qué diferencies atopes cola Tierra?
-¿Cuánto dura un día en Saturnu?
-¿Cómo se llama’l so satélite más grande y por qué ye importante?
