L’undécimu monarca del Reinu d’Asturies, el decimosegundu si contamos a Nepociano, foi Ramiro I. El so socesor foi’l so fíu Ordoño I, qu’ascendió al tronu por herencia, finando asina cola tradición eleutiva del Reinu d’Asturies.
El so reináu foi curtiu (842-850), nun llegó a 8 años, pero mui movíu pola so forma de llegar al poder, les tensiones internes y ataques viquingos que sufrió per vía marítima. La so mayor contribución foi artística, cola construcción de dalgunos de los edificios prerrománicos más señalaos.
¿Sabíes qué…? Recibió’l nome de ‘Uirga iustitiae’, que vien a significiar vara de xusticia, definición dase pola so severidá na alministración de xusticia contra lladrones, rebeldes o magos, que seríen les persones que siguíen faciendo rituales paganos.
La versión más estendida na historia ye qu’Alfonso II lu escoyera como socesor, pero’l que xubiría al tronu sería Nepociano, conde palatinu y cuñáu del monarca conocíu como ‘El Castu’, anque otros refiérense a él como un rei ‘iléxitimu’. La muerte d’Alfonso II pillólu en Bardulia, territorios que llueu llamaríense Castiella, onde diba casase, pero al enterase desplazóse a Lugo pa formar exércitu y dirixise a Uviéu.
L’alcuentru con Nepociano daríase al altor d’El Narcea, na zona de Corniana, pero’l breve rei veríase abandonáu polos sos homes, pa ser poco depués prindáu na fastera oriental asturianam castigáu con ceguera y apresáu nun monesteriu. D’esta forma, Ramiro I llegaría al tronu del Reinu d’Asturies.
¿Sabíes qué…? Un afayu reciente, una llábana, en Santa María del Naranco, que se cree que podía pertenecer al so sarcófagu, abre la posibilidá de que Ramiro I concibiera esti edificiu pa ser la so tumba, abriendo campos nuevos d’investigación
Nun sería una época de muncha conflictividá colos musulmanes, anque les cróniques falen de dalguna campaña na zona d’Araba y La Rioja, pero sí tendría qu’atender a dos llevantamientos internos y a dos ataques viquingos. El primeru foi nel añu 844 en Xixón –la ‘Crónica Albeldense’ refierse a ellos como normandos– y poco depués na zona de l’actual A Coruña.
El reináu de Ramiro I tendría especial importancia nel terrén artísticu, algamando’l prerrománicu’l so mayor esplendor. Baxo’l so mandatu construyiríase Santa María del Naranco, Samiguel de Lliño y Santa Cristina de Ḷḷena, monumentos que de xuru conoces, y afitaríase un estilu constructivu, al que se conoz como ramirense.
-¿Quién foi’l primer monarca asturianu?
-¿Yera Ramiro I el llexítimu socesor d’Alfonso II?
-¿Cuála foi la so contribución al arte asturianu?
-Cita otros monumentos prerrománicos que conozas.
