Ye una de les cuestiones que güei ta en boca de tol mundu porque ta llamada a camudar el mundu tal y como lu conocemos. La intelixencia artificial va suponer toa una revolución, al mesmu nivel que lo foi Internet, pola cantidá d’aplicaciones que pue tener y el tratase d’una teunoloxía que ta faciendo avances d’una manera rapidísima.
¿Pero qué ye la intelixencia artificial? Básicamente ye la dotación a una máquina de capacidaes humanes como’l razonamientu, l’aprendizaxe, la creatividá, la resolución de problemes o la planificación. Una habilidá que va perfeicionando según vaya recopilando más datos.
¿Sabíes qué…? La intelixencia artificial vien aplicándose dende va décades, pero ye nos años 20 del sieglu XXI cuando ta viviendo un crecimientu esponencial, ensin precedentes.
Considérase que foi nel añu 1956 cuando, na Conferencia de Darthmouth, n’Estaos Xuníos, John McCarty, Marvin Misky y Claude Shannon afitaron el términu intelixencia artificial, anque previamente Alan Turing y otros estudiosos yá valorara la capacidá de les máquines de pensar. Les previsiones de Darthmouth nun llegaríen a cumplise, pero arrancaba un camín fructíferu.
Poco a poco diríen dándonse avances, pero nun sería hasta’l 1996 cuando la sociedá sería consciente de los mesmos. Foi cuando’l maestru rusu d’axedrez Gary Kasparov enfrentó con una computadora diseñada pola empresa IBM de nome Deep Blue, que consiguiría derrotalu n’otru enfrentamientu disputáu al añu siguiente con una versión más avanzada de la máquina.
¿Sabíes qué…? Nel 1950 Turing desendolca nun ensayu’l ‘Test de Turing’, una prueba de comunicación verbal pa evaluar la capidá d’una máquina de caltener un comportamientu indistinguible d’un humanu. Ésta marcó l’entamu del desarrollu de lo que llueu se llamó intelixencia artificial.
Ferramientes como ChatGPT, una intelixencia artificial desendolcada nel 2022 y abierta a tolos usuarios, sorprendieron al mundu pola so capacidá de caltener conversaciones, ellaborar testos o poesíes y espresase en diferentes idiomes, a les que tán siguiendo otres munches pa la creación d’imáxenes o inclusive composición musical. Una evolución capaz de ximelgar al mundu y abrir alderiques éticos sobre la intelixencia artificial y la necesidá de regulala, hasta’l puntu de llanzase mensaxes apocalípticos de non facelo.
Sicasí, la intelixencia artificial abre importantes posibilidaes en tolos campos. La so aplicación nel ámbitu de la salú (ciruxíes), tresporte, ciberserseguridá, xestión de datos, l’Internet de les coses, prevención de desastres, videoxuegos o comunicaciones ta tresformando les nueses vides. Y lo que ta por venir.
RESPUENDI ESTES ENTRUGUES:
-¿Qué sentisti falar de la intelixencia artifical?
-¿Cuáles foron los fechos más importantes del so desendolcu?
-¿En qué coses de la to vida diaria l’atopes?
-¿Cuál ye la to opinión sobre la intelixencia artificial?
